चल नेऊया ती चंद्रकळी,
संभाळूनिया आज घरी.
गुंफून टाकू काड्यांमध्ये,
बेमालूम ती नक्षिपरी
सुंदर होईल अपुले घरटे,
कवडसे रांगोळी होतील.
शीतल सुंदर चांदणं रात्री,
प्रेमाचे क्षणही सजतील.
चमचम करतील लाख चांदण्या,
स्वप्न पिल्लांना दिसतील त्यातून.
नक्षत्रांची ओढ लागुनी,
सातही गगने जातील लांघुन.
फुलेल तोवर चंद्र कळीतून,
उजळून अंगण टाकील सारे..
सायंकाळी आयुष्याच्या,
दीप दृष्टीला हवाच ना रे!
- कल्याणी
(२७/६/२०१८ दुपारी ३:४५)